ანსამბლზე გადაღებულია დოკუმენტური ფილმი (რეჟ. დიმიტრი გუგუნავა 1988), სხვადასხვა სატელევიზიო გადაცემა, მათ შორის “მთიები” ქართლში, ავტორები _ ლია დავლიანიძე, ნანა გურგენიძე (საქართველოს ტელევიზიის Iარხი 1982), “მთიები” საგარეჯოს რაიონში ავტორები _ ქეთევან კაპანაძე, ლია დავლიანიძე (საქართველოს ტელევიზიის Iარხი 1989), “მთიები”, ავტორი _ დალი გურგენიძე (საქართველოს ტელევიზიის Iარხი 1990), “ალილო ბიჭო”, ავტორი _ ლუიზა შაკიაშვილი (საქართველოს ტელევიზიის Iარხი 1997), მღერის “მთიები”, ავტორი ლუიზა შაკიაშვილი (საქართველოს ტელევიზიის Iარხი 1998), “მთიები” დიდ ბრიტანეთში, ავტორები _ ლუიზა შაკიაშვილი, თინათინ ჩიკოიძე (საქართველოს ტელევიზიის Iარხი 1998), “მთიები”, ავტორი _ თამარ თაგვაძე (საქართველოს საპატრიარქოს ტელევიზია “ერთსულოვნება” 2009), “ქართული ხმები”, ავტორი _ კახა გრიგალაშვილი, რეჟისორი სოსო სტურუა (საქართველოს ტელევიზიის Iარხი 2009). აგრეთვე არაერთი რადიო გადაცემა. “მთიებს” მონაწილეობა აქვს მიღებული არაერთ დოკუმენტურ ფილმში, მათ შორის მერაბ კოკოჩაშვილის “ფენომენში”.

2001 წლიდან ანსამბლ “მთიებს” ედიშერ გარაყანიძის ვაჟი გიორგი (გიგი) ხელმძღვანელობს. მან 2003 წელს განაახლა შემადგენლობა და ჩამოაყალიბა ქალ-ვაჟთა შერეული ჯგუფი, რომლის წევრებიც აუთენტურ შემოქმედებით პრინციპებზე აღიზარდნენ სტუდია “ამერ-იმერში” და რომლებიც დღეს, უფროს თაობასთან ერთად, ედიშერ გარაყანიძის სახელობის ეთნომუსიკის თეატრ “მთიებში” არიან გაერთიაიანებულნი.